Բարեգործական ծավալուն գործունեություն են իրականացնում նաև բազմաթիվ բարեգործական կազմակերպություններ, որոնցից են` Հայկական Բարեգործական Ընդհանուր Միությունը, Հայ Օգնության Միությունը, Հայկական Կարմիր Խաչը, "Հովարդ Կարագյոզյան" հաստատությունը, "Գալուստ Գյուլբենկյան" հիմնարկությունը, Ջինիշյան հիշատակի հիմնադրամը, Հայ Օգնության Ֆոնդը և այլ կազմակերպություններ:

Տեղեկացնում ենք, որ ՀԱՅԱԴԱՐԱՆ Համահայկական Տեղեկատվական Համակարգի պաշտոնական կայքում համապատասխան տարածք է հատկացվելու ՀՀ-ի և Արցախի մանկատների ու ծերանոցների համար առաջին անհրաժեշտության նյութական կարիքները լուսաբանող ցանկը ներկայացնելու համար: Շահագրգիռ ֆիզիկական ու իրավաբանական անձինք կարող են մշտապես հետևել կայքի համապատասխան բաժնում տեղակայված ցանկին և, նույնիսկ առանց ՀԱՅԱԴԱՐԱՆԻ միջնորդության, մասնակցել Բարեգործական Նախաձեռնությանը: Մեր կայքում նշվելու են մանկատների և ծերանոցների անվանումները, նրանց կոնտակտ-տվյալները, տնօրենների անուն-ազգանունները, հասցեն, հեռախոսահամարը և էլեկտրոնային հասցեն: Հետագայում, կայքի համապատասխան բաժնում կներկայացվի տրամադրված նյութական օգնության վերաբերյալ ամբողջական տեղեկատվություն, օգնություն տրամադրած հաստատությունների անվանումները, նրանց ղեկավարների, ինչպես նաև բարեգործ-անհատների անուն-ազգանունները, որոնց փոխանցած գումարների շնորհիվ իրականացվել են օգնությունները: Առանձին աղյուսակով կներկայացվի ֆինանսական հաշվետվություն` մուտքերի և ծախսերի մասին:

"Նյութական օգնություն մանկատներին և ծերանոցներին" Բարեգործական Նախաձեռնության նպատակն է բավարարել ՀՀ-ի բոլոր մանկատների և ծերանոցների առաջին անհրաժեշտության նյութական կարիքները, իսկ հետագայում` ներգրավել նաև Սփյուռքի համանման առաքելությամբ հաստատությունները:

ՀԱՅԱԴԱՐԱՆ Համահայկական Տեղեկատվական Համակարգի Տնօրենների Խորհուրդը նպատակահարմար գտավ իրականացնել սույն Նախաձեռնությունը` գրանցված բոլոր կազմակերպությունների փոխանցած գումարի, ինչպես նաև բարեգործ-անհատների նվիրաբերած գումարի 10% բաժնեմասը հատկացնելով մանկատներին և ծերանոցներին՝ նյութական օգնության ձևով:

Մանկատների և ծերանոցների տնօրեններին հղվել է պաշտոնական գրություն, խնդրելով` ներկայացնել առաջին անհրաժեշտության նյութական կարիքների մանրամասն ցանկը:

Առաջին անհրաժեշտության նյութական կարիքների ցանկում ներառվող ապրանքներն ինքնարժեքով տրամադրող կազմակերպությունների ու բարեգործ-անհատների տվյալները զետեղվում են կայքի հատուկ բաժնում, որտեղ ներկայացվում են Նախաձեռնությանը սատարողների անունները՝ որպես աջակից:

Հիշե´նք. Մեծ եղեռնից հետո սկսվեց "Մեկ Որբ, Մեկ Ոսկի" նշանաբանով որբահավաք աշխատանքը, որի շնորհիվ փրկվեցին թուրքերի, քրդերի և արաբների տներում գտնվող հազարավոր որբեր:

Այսօր ՀԱՅԱԴԱՐԱՆ Համահայկական Տեղեկատվական Համակարգն ասում է. "Հեռու´ վանենք մեզանից անտարբերություն կոչվող չարիքը, կարեկցանքով ու սրտացավությամբ համախմբվենք մեր լքված փոքրիկների, տատիկների ու պապիկների շուրջ` ընդամենը վճարելով մեր դահեկանը:"

Կազմավորվում է Հոգաբարձուների խորհուրդ, որտեղ ներգրավվելու են բոլոր այն շահագրգիռ անհատներն ու իրավաբանական անձինք, ում համար ազգասիրությունը կենսակերպ է, ում համար հոգեհարազատ է "Հայրենիքն է Տունս, Ազգը` Ընտանիքս" կարգախոսը, Քրիստոնեությունը բառակապակցություն չէ և Պետությունը Յուր Ամրոցն է: